1930 Kum Siyin Khua sat na thu

Thumasa 1

1930 kum in Pu Thuam Kam (Khuasak) leh alawmte 17 in Kawl Sizangkhua nasat hi. Kawl Sizangkhua sia khuamin masabel a hihi. Hi khua min sia Mawlaik Mangpipa thukimpui hi aa, Siyin Ywa ci-in ngamlimbu sung zong ah kiciamteh hi.

Kawl sizangkhua ci-in khua min aphua bangma in Pawlpi minzong Kawl sizang Tuiphum Pawlpi ci-in naphuak hi. Khuasung ah tuankungkuung bulkhatpan kungthum hongmeang ahiman Kawlte in Kyohthonebin Ywa ci-in hong tepte sak hi. Tuamin tawh kizui-in khuasatpa Pu Thuam Kam min phua sia hun khat ciang hong bo aa, Thing Unaukhua hongsuak a hi hi.

1991 kum ciang Pawpi in thuthun leh thungui-let akivawt ciang Pawlpi min kip tu in, Pu Thuam Kam minphua sa a hi, Siyin Baptist Church Siyin Tuiphum Pawlpi kici hi. 1992 kum February (37) vei-na KVBA Delegate in kipsakna hongnei hi. Tu ni ciangdong kizangh paisuak hi.

Pawlpi akiphu lai-in inn 18 tawh na kipan aa, tu in Pathian in hongkhangto sak a himan inn 180 bang kipha hi. Pawlpi pianzawk kum 75 bang hong cingtu hi zo lei napi taangthu, tuanthu akiciangtak in ki-nei kivawt zo ngawl lai hi.

Tu in Pawlpi pian zawk hun 75 hong cing tatak petma a himan taangthu, tuanthu akicing tatak ahizo bua zongin akilawm ciangkhat neithei natu ki deih ahiman taangthu kaikawm committee kiphuan aa, committee te in mai-lam ah taangthu tuan thu akicing in vawtzawk hunciang akidoppha thei natu in ahi thei za ciang kai khawmin abu in hongkivawt a hihi. Mailam ah akicing mama in, ih neithei natu akuama po in ngaisutna te ngawmkhawm in, ih hanciam laitu hi.

Rev.P.Suangh Cin Pau

Senoir Pastor

Siyin Baptis Church

SIYIN KHUA TAANG THU

Pawlpi taangthu ih ci ciang khuasaa leh palpi phot kithua ahimanin apianna ih att phot kul ahiman anuai a bang ahihi.

1929 kum Septermber tha sung in Khuasak khua Pu Tongseal tuu Pu Thuam Kam leh anaupa Hony. Captain Pau Cin (Naib Commkandant) te unau ii mai sang Khamtung nuntaknan haksa va-ail tu amu khol na pan in ah uu in anau mun ah Kawlzaang teen tu a ukna a-kikup pui ciang anau zongin lungkimpui ahiman Falam mangpipa tung ah 1929 October ni 25 seaulua toh ngeen hi. Falam mangpipa in "Kawlzaang sia ka khut sungah omngawl hi. Mawlaik mangpipa khut sung om ahi ciang ama tungah ngeenzaw vun na, panpuina lai khat kong pia tu hi" ci-in ah pia hi.

Falam mangpipa thukimpuina lai anga zawk ciang Sizang khua 5 teng sam in "tu in Mawlaih-Mangpipa kungah seau tuka hi ciang Kawlzang taai tu na kheal ki ba na tu uh ziam!" ci-in dongh aa, "ka kheal ba tu uh" a ci uh ciang Mawlaik mangpipa tungah 1930 April tha 26 ni in seaulua lai apiahi.

Mawlaik Mangpipa in Pu Thuam Kam tungah, "Kawlzaang khuasat nuamna hi lehkhua saat ngeina om bangin Kumpite ngeina kamciam anuai ateng na zui uh kul tu hi" acih ciang, "ka zui tu uh hi" ci-in kamciam ah piak teng:

(a) Kumpi tittaw ngam ngam khamna pan taikhat sung sangah khua teng thei ngawl-lo tho thei ngawl tu nu hi.

(b) Khua saat zawk kum 3 sung inn 20 na pha zo bua uhleh ki phiat kik tu hi.

(c) Kum 3 a cinhma in kumpi ngam sungah khialna na neih uhleh ki phiat kik tu hi.

Pu Thuam Kam in, "Atung aa kam ciam teng zui zo le-ung uk tuam nong pia tu ziam" ci-in dokciang, "Tu teng bek tawh suak ngawl lai tu aa, inn 40 na phak pa po ciang Hausa (Chief) khat hong ki pia tu aa, tasia ma teng Kalemyo hausapa U Ba Kyaing khut sung omtu nu hi" ah ci hi. Tasia ciang Pu Thaum Kam in, "Kam beh toh thu nogn pak sia khotak ngawl tu ahi ciang aki samhna poah ka lak thei tu in lai khat nong pia tu" ci-in a nget ciang Mangpipa in 1931 January tha ni khat ni-in Kalemyo hausa U Ba Kyaing ukna sungah ah teen thei natu inlai ah pia hi. Mangpipa in khua min tu a dok ciang, "Sizang ngam pan inn tuan ka hi uh ciang Kawl Sizaang khua ka ci tu uh hi," a ci hi. Mang Kamg kumpite in Sizaang ci thei ngawl a hi man Siyin hong ci aa, tu dongin ki zangh pai suak hi.

Pu Thuam Kam Mawlaik pan hong cia kik ciang Sizaang khua sung ah thu zaksakkik in, ama inn ah 3 vei thuzaksak na leh a 2 vei kikhop na neak khop vawt tawng ci-in vok tuk 4 khat ngo in thu kikupna nei aa, a thukikup te hoi sa mama ahikom khuasak mi ngawl teng in a nuai a bangin thudokna le kamciam kipiakna nei uh hi.

(a) Pu thu pa thu te thin ngil lung ngil in nei ngawl tu;

(b) Uk tuam ih nga zong, ih nga bua zong mimsii-taangsii (siaa) ki la ngawl tu;

(c) Tuuk tha Khal thaa kila ngawl tu;

(d) Minam lianzaw-nauzaw omsak ngawl tu;

(e) Lei le haa zong po khawm aa kipet tha thei a hi caing khat le khat diksak ngawlna aom ciang;

Khuadang tuidang taw thu ahi bana leh loai 4 loai 8 thu omsakngawl tu aa, Laithiangtho sung om bangin kimai sak tu hi.

"Keima in amin in hausaa kongseam tu a, thu hongkhen tu se, laithiangtho hitu hi" ci-in Pu Thuam Kam in, kamciam a pia hi. Tasia pan kipan kawl Sizaang khua ki saat in pawlpi zong ki phuan aa pawlpi taangthu aki at thei ahi hi.

Khuasaat ki patna

1929 kum in khuasaat tu in Pu Thuam Kam lampui in Pu Suangh hang (khuasak) Pu Son Ngin (khuasak) Pu Kim Tun (khuasak) khua mun tuvial tu in tangmi in paisuk uh aa, mun le ngam laamtee in, hawm in leitangh kuama in huaiham peangngawl in, luam 2 kilaklaw sia inn 2 veu in hawm hi. Inn mun hawm na sungah biak inn mun tu zong ngeal paihi.

(azom omlai hi, ahai ngawl in kongsuak sak tu hi.)